EDITO:
Reforme jo, mee net egal wéi eng !

Et ass Rentrée zu Lëtzebuerg ! Virun allem d’Politik erwächt aus dem Summer-Schlof  a stellt sech am Alldag erëm den Erausfuerderunge vum Liewen.

Als FGFC hu mir et dës Kéier mat enger speziell chargéierter Rentrée ze sinn.

Intern preparéiere mir schonns iwwer 3 Joer en dynamesche Reform-Prozess fir eis Gewerkschaft fir d’Zukunft opzestellen. Genau wéi d’politesch Parteien hu mir nämlech Problemer mam fräiwëllegen Engagement vun eise Membere  
fir eis gemeinsam Cause. D’Zäite vum Bénévolat sinn och bei eis Gewerkschaften gréisstendeels um Enn. Dëst stellt eis virun d’Erausfuerderung, eise Service um Member ze professionali-séieren, ouni de Kontakt mam Terrain ze verléieren. Zesumme si mir zur Conclusioun komm, datt mir eis als Gewerkschaft musse grondleeënd reforméieren.

Dofir ass virgesinn, datt um nächsten FGFC Kongress Enn September de Wee fräi mécht fir eng nei Approche mam Zil, frësch engagéiert Leit ze fannen. Dës Campagne ënnert dem Motto „GoTeam” leeft schonns a soll motivéiert Leit vun de Gemengen op eng modern Aart a Weis fir eis Aarbecht begeeschteren. Bis 2020 solle mir dann zesummen, jonk an al, sämtlech Aufgabeberäicher vun engem modernen, sozial vernetzten a gewerkschaftlechen Déngschtleeschter développéieren an ëmsetzen.

Ech gleewen drun, datt eis jonk Leit motivéiert sinn. Och si wëllen hiert Liewen interessant a sozial gestalten. Dat wat hinnen op der Gemeng awer oft feelt, ass d’Unerkennung vun hirer Perséinlechkeet. Dëst sollen si bei eis fannen.

Betreffend déi kommend Gemengewahle stelle mir an dësem Magazin d’Fro, ob eis Demokratie iwwerhaapt nach representativ ass. Och ass Thema, wisou mir eis esou schwéier dinn d’Fraen ze promovéieren, ouni a blöd Stereotypen zeréck ze falen. Zudeem gëtt et héich Zäit, datt sech elo am Oktober eng nei Generatioun vun „open-minded” Gemengepolitiker weist, déi mat eis zesummen eng nei Organisatiouns -a Kommunikatiounskultur mat op de Wee bréngt.

Zum 1. September ass och nach d’Reform vun der Fonction publique bei eis op de Gemengen a Kraaft getrueden. Fir mech perséinlech ass dës Reform keng richteg Reform. Hei ass et virrangeg drëms gaang Suen ze spueren oder dat ëmzesetzen, wat d’Regierung souwisou huet misse maachen.

Richteg rose mécht mech de soit-disant „Stage” vun 80-80-90 % vun der Ufanks-pai. Ech behaapten elo schonns, datt eis Leit a bal alle Gemenge kee rengen Apprentissage vun hirer Funktioun wäerte maachen. Trotzdem kréien se manner Pai, dëst obwuel d’Wunnen an d’Liewen ëmmer méi deier gëtt. Dobäi kënnt, datt dës 3 Joer och nach net fir d’Carrière zielen. Dëst ass dat Lescht !

Hei stellt sech fir mech d’Fro : Ass et wierklech un de jonke Kolleginnen a Kollege fir hei d’Pan ze klaken ? Solidari-téit an zesummenhalen ass ugesot. Hei muss onbedéngt eng nei Léisung hier, zemools mir eis wierklech net iwwert  déi aktuell Wirtschafts-Croissance  bekloe kënnen.
Donieft kënnt elo d’Gestion par  objectifs, Organigramm, Majorations d’échelon a villes méi. Mir si gespaant, wéi dëst ob de Gemengen ëmgesat gëtt. Hei si mir do fir ze hëllefen an ze vermëttelen, wäerten awer och net mat Kritik spueren, wann et néideg gëtt.  Eng Hotline fir är Froen ass schonns en Place : reformen2017@fgfc.lu

Bei allem wat usteet, geet et um Enn ëmmer ëm den Ausbau vum Service um Client „Bierger”. Matt kompetentem, zefriddenem a valoriséiertem Personal erreeche mir dat Zil am Beschten. Mir wëlle Reformen, jo, mee net egal wéi eng.

Marco Thomé
FGFC-President